По победата над Енко Куако на Австралија опен, Новак Ѓоковиќ се осврна и на неточното известување на Еуроспорт за паузата во тоалетот што Новак ја направи во првото коло.
Заедно со снимката на која Ѓоковиќ му кажува на судијата дека мора да оди во тоалет во првото коло на Австралија Опен, имаше опис: „Новак Ѓоковиќ му се спротивстави на судијата и отиде на предвремена пауза во тоалет“.
Новак најпрвин се огласи на социјалните мрежи и објасни што точно се случило, а потоа зборуваше за тоа и со српските медиуми.
Видно вознемирен, Ѓоковиќ го започна своето долго претставување во една од малите прес-соби во Мелбурн Парк.
„Повторно сум доведен во позиција да морам да реагирам, јавно… По втор пат во шест месеци имам проблем со Еуроспорт. Организираа нова компанија од Лондон што им прави дигитални медиуми, видов дека е некој нов, така ми кажаа… Не се сеќавам точно што се случи (пред шест месеци), но тогаш реков дека јас не би дал интервјуа за Еуроспорт. Потоа ми се извинија и беше во ред, а еве сега, шест месеци подоцна, повторно прават сензација од нешто што е извадено од контекст“, вели Ѓоковиќ и додава:
„Кога го напишав ова денес, тие ја избришаа објавата, исто како што ја избришаа и последната. Добро, и дадов интервју на Барбара Шет, таа ми се извини. И Борис Бекер ми пиша, Матс Виландер, сите работат за Еуроспорт, немам ништо против нив. Го сакам Еуроспорт, го сакам спортот, цел живот гледам скијање на Еуроспорт, но такви ситуации…“
Новак застана накратко, само да дише, а потоа продолжи:
„Мора да има навремен систем за заштита во нашата организација – АТП или ВТА – за некој да реагира, некој да направи нешто. Јас сум лесна цел да бидам негативец. Така ме претставуваат, сега ми е нормална појава, но нема да трпам неправда. Некои работи можам да ги поднесам, а некои не – не заслужуваат само така да ги пуштам, иако си во право, јас нормално не реагирам, а можев илјада пати да реагирам за разни работи. Денеска ја надминаа секоја мерка. Никој јавно не ми се извини. Дали јавно ќе ми се извини? Не верувам. Еуроспорт го пренесува Австралија опен, тие се еден од најголемите спортски канали во светот. Би можеле да ми испратат јавно извинување“.
Ѓоковиќ потоа објасни каква би била вредноста на тоа јавно извинување.
„Двата пати ми се извинија приватно, а луѓето тоа не го знаат – само јас знам, ти знаеш овде затоа што ти кажав сега, но повеќето луѓе кои следат тенис нема да го знаат тоа: тие сепак ќе мислат дека сум јас, и покрај тоа што ми кажа судијата отидов во тоалет и дека не ги почитував правилата. Па, пак јас сум тој што се однесува како сака, а тоа воопшто не е така, убаво објаснив во текстот што се случило. Повторно јавно го поставувам прашањето: зошто АТП или Грен слем не излегоа да ја објаснат ситуацијата, кога гледаат дека медиумите ме линчуваат? Тоа се случува континуирано – има многу такви ситуации, но сето тоа се сведува на истото, на крајот на денот: ако сме дел од оваа турнеја, претпоставувам дека има одредена одговорност, одредена заштита… Не : ‘Сега вие правите што сакате и го скарате по медиумите, а ние молчиме’“.
Во третото коло на Австралија опен Ѓоковиќ ќе се сретне со Григор Димитров од Бугарија, а познато е и кога ќе започне тој дуел.
