Иако ги почитува двајцата најголеми ривали Роџер Федерер и Рафаел Надал, тенисерот Новак Ѓоковиќ вели дека никогаш не бил пријател со нив.
– Никогаш не бевме пријатели, тоа не е можно меѓу ривалите, но никогаш не бевме ниту непријатели. Отсекогаш го почитував Федерер, тој е еден од најголемите на сите времиња, имаше неверојатно влијание, но никогаш не бевме блиски – рече Ѓоковиќ.
Во почетокот на кариерата Новак неколку пати излегувал на вечера со Надал, но дека едноставно не можеле да бидат пријатели.
– Рафа е само една година постар од мене, двајцата сме Близнаци во хороскоп, а во почетокот дури двапати излеговме на вечера. Но и со него пријателството е невозможно. Отсекогаш сум го почитувал и многу му се восхитував. Благодарение на Федерер и на него, станав тоа што сум. Тоа ќе нѐ обедини засекогаш, и затоа чувствувам благодарност кон нив. Надал сѐ уште е дел од мојот живот. Во последните 15 години го гледам почесто од мајка ми – рече Ѓоковиќ за италијанските медиуми.
Новак Ѓоковиќ на турнирот во Рим, Италија, во осминафиналето ќе се соочи со Камерон Нори. Федерер се пензионираше, а Надал го нема на турнирот.
