Германското обвинителство водело истрага за поранешниот папа Бенедикт Шеснаесетти како можен соучесник во аферата за сексуална злоупотреба во времето кога бил надбискуп во јужна Германија, но истрагата била прекината поради недостиг на докази, соопштија денеска обвинителите во Минхен.
Истрагата опфатила тројца високи католички свештеници, наведуваат истражителите. Меѓу нив биле покојниот папа Бенедикт, кој како кардинал Џозеф Рацингер во периодот меѓу 1977 и 1982 година бил надбискуп на Минхен и Фрајзинг, како и неговиот наследник, кардиналот Фридрих Ветер и потоа генералниот викар Герхард Грубер, кој извршувал административни должности во надбискупијата.
Постапките, меѓутоа, една по друга биле отфрлани откако истрагите не обезбедиле соодветни докази за криминално однесување од страна на одговорните за црковниот персонал, наведоа обвинителите.
Тие истражувале повеќе од 40 случаи на сомнителни кривични дела поврзани со извештајот за злоупотреба, објавен во јануари 2022 година, а веќе во февруари минатата година биле претресени просториите во архиепископијата.
Починатиот папа Бенедикт беше на удар на критики затоа што не постапил доволно решително против свештениците обвинети за злоупотреба за време на неговото време како надбискуп и префект на Конгрегацијата за доктрина на верата, помеѓу 1981 и 2005 година.
За папа беше избран во април 2005 година, а во февруари 2013 година поднесе оставка. Почина во декември 2022 година на 95-годишна возраст.
