Германија целосно ќе престане да купува руски јаглен на 1 август и руска нафта на 31 декември и ќе доживее голема промена во изворот на снабдување со енергија на земјата, изјави заменик-министерот за финансии Јоерг Кукиес на конференција во Сиднеј.
Клучниот предизвик пред нас ќе биде пополнување на огромната празнина што ќе остане кога Европската унија ќе се откаже од 158 милијарди кубни метри гас што годишно ги испорачува Русија, рече Кукиес.
„За неколку недели нема да имаме повеќе руски јаглен“, рече тој на енергетскиот форум во Сиднеј, чиј домаќин беше австралиската влада и Меѓународната агенција за енергија.
Русите претходно испорачувале 40 отсто германски јаглен и 40 отсто нафта, рече тој.
„Секој што ја знае историјата на нафтоводот Дружба, кој веќе беше алатка на советската империја над Источна Европа, знае дека ослободувањето од таа зависност не е безначајна работа, но тоа ќе го постигнеме за неколку месеци“, рече Кукиес.
Германија забрзано развива терминали за увоз на течен природен гас (LNG) за да помогне во пополнувањето на празнината во снабдувањето со гас, но тој нагласи дека додека Соединетите Американски Држави и Катар заедно би можеле да испорачаат околу 30 милијарди кубни метри гас во форма на ЛНГ во Европа, тоа не е сепак доволно.
Иако Германија е фокусирана на транзиција кон нето нула емисии и неодамна усвоена легислатива за забрзување на развојот на проекти за обновлива енергија, гасот ќе биде клучен за таа промена, рече Кукиес.
