Фудбалерите на Холандија ја совладаа Полска попладнево во Хамбург со 2-1 (1-1) во воведниот натпревар од групата Д на Европското фудбалско првенство.
Холандија до победата дојде со пресврт откако Букса ја донесе Полска во водство во 16 минута.
Резултатот го израмни Гакпо во 29 минута, а победата на Холандија ѝ ја донесе резервистот Вегхорст во 83 минута.
– Многу е важно да дојдете до победа на првиот натпревар и да го почнете турнирот со освоени три бода. За мене лично, ова сценарио беше како од соништата. Влегов во игра и дадов гол за победа. Видов дека топката ќе дојде до мене и го почувствував моментот. Ова е првиот чекор, сега наша цел е да си заминеме со трофејот од Европското првенство – изјави Вегхорст по натпреварот.
Воведното коло во групата Д ќе биде комплетирано утре со дуелот меѓу Франција и Австрија.
