Технолошкиот гигант Мета во ноември воведе опција за претплата за корисниците на Facebook и Instagram. Многу корисници на двете апликации деновиве добија известување и во Словенија дека треба да донесат одлука за огласи.
„Донесете одлука за рекламите“ беше известувањето што ги чекаше многу словенечки корисници на Фејсбук и Инстаграм, сопственост на технолошкиот гигант Мета, по отворањето на апликацијата.
Со само неколку кликања, корисникот може да одлучи да продолжи да ја користи мрежата бесплатно, а со тоа да се согласи на насочено рекламирање. Доколку одлучи да плаќа месечна претплата, неговите податоци нема да се користат за рекламни цели.
Месечна претплата за корисничко искуство без реклами е достапна за корисниците во ЕУ, Европската економска област (ЕЕА) и Швајцарија. Опцијата за корисниците да купат претплата за искуство без реклами, смета технолошкиот гигант, ги балансира барањата на европските регулатори додека на корисниците им дава избор.
Колку е месечната претплата?
Претплатата за користење Фејсбук и Инстаграм без реклами во веб-прелистувачи на персонални компјутери изнесувала 9,99 евра месечно. Корисниците на двете апликации ќе треба да плаќаат 12,99 евра месечно за искуство без реклами на нивните паметни телефони.
Причината за поголемата претплата на паметните уреди е провизијата што ја наплаќаат Google и Apple на програмерите во нивните продавници за апликации, објасни Мета.
До 1 март 2024 година, претплатата ќе ги покрива сите поврзани сметки во Центарот за сметки на корисникот. Од март, секоја дополнителна сметка ќе подлежи на дополнителен надомест од шест евра месечно за веб-прелистувачи и осум евра месечно за апликации на паметни уреди.
