Фрижидерите што содржат флуорирани гасови ќе бидат повлечени од продажба до 2026 година, додека некои топлински пумпи и клима уреди ќе ја доживеат истата судбина една година подоцна.
Преговарачите од Советот на Европската унија и Европскиот парламент постигнаа договор со кој до 2050 година ќе се забрани употребата на моќни стакленички гасови што се користат во апарати како што се фрижидери, климатизери и топлински пумпи. Станува збор за флуорирани гасови, кои еколошката организација Гринпис ги опиша како најлоши гасови со ефект на стаклена градина.
Овие гасови имаат до 25.000 пати посилно влијание врз глобалното затоплување од јаглерод диоксидот и се произведуваат умерено, пренесува француската агенција АФП.
Во ЕУ емисиите на флуорирани гасови се удвоиле во периодот од 1990 до 2014 година, но по 2015 година, кога биле донесени првите законски мерки во оваа област, тие почнале да се намалуваат. Според новиот закон, гореспоменатите гасови ќе бидат целосно забранети до 2050 година.
„Овие супстанции имаат исклучително негативно влијание врз здравјето на нашата планета и мора постепено да се исфрлат“, изјави шпанската министерка за животна средина Тереза Рибера Родригез.
Таа е убедена дека ова е важен чекор во борбата против климатските промени. Договорот допрва треба да биде официјално потврден од Советот на ЕУ, во кој учествуваат претставници на земјите-членки и на Европскиот парламент. Регулативата потоа ќе може да стапи во сила.
