Олена Зеленска, првата дама на Украина, нема да присуствува на утрешниот говор на американскиот претседател Џозеф Бајден за состојбата на нацијата во Конгресот на САД и покрај поканата на Белата куќа, најверојатно поради најавеното присуство на вдовицата на Алексеј Навални – Јулија.
– Поради планираните настани во распоредот, вклучително и посетата на децата од сиропиталиштето во Киев, која беше однапред планирана, првата дама за жал нема да може да учествува на настанот – изјавија за Политико од кабинетот на Зеленска.
Сепак, „Вашингтон пост“ објави дека уште една причина зошто Зеленска ја одбила поканата е затоа што таа требало да седи во близина на првата дама на САД, Џил Бајден, и Јулија Навални, вдовицата на рускиот опозициски лидер Алексеј Навални, кој почина во руски затвор минатиот месец.
„Вашингтон пост“ наведува дека тоа предизвикало непријатност кај највисокото раководство на Украина, бидејќи многу Украинци не ги гледаат Навални и другити руски опозиционери како сојузници во борбата против рускиот претседател Владимир Путин.
Ваквите резерви кон Навални потекнуваат од неговите изјави од 2014 година кога рече дека полуостровот Крим, кого Русија го анектира во 2014 година „не е сендвич па да биде вратен назад“, став со кој го поддржа официјален Кремљ. Навални подоцна ги ревидираше овие ставови, велејќи дека целосно го поддржува суверенитетот на Украина во нејзините меѓународно-признаени граници и дека ја осудува руската агресија врз Украина, но мислењето за него во украинската јавност не се смени многу.
Сепак, и Јулија Навална ја одбила поканата на Белата куќа, наведувајќи го заморот како причина.
