Во САД, 14 лица ослепеле, а четворица починале поради бактерии поврзани со капки за очи. Производителот ги повлече контроверзните вештачки солзи, но со оглед на тоа што милиони ги користат капките за очи, веста предизвика прилично голема загриженост.
Капките за очи во прашање се EzriCare, кои кај некои луѓе предизвикале инфекција со псевдомонас. Според последните информации на американскиот Центар за контрола и превенција на болести (ЦДЦ), повеќе од 80 лица се заразени.
„Пациентите кои користеле вештачки солзи EzriCare или Delsam Pharma и кои имаат знаци или симптоми на инфекција на очите треба веднаш да побараат медицинска помош“, советува ЦДЦ.
Симптомите може да вклучуваат жолт, зелен или јасен исцедок од окото, болка или непријатност во очите, црвенило на окото или очниот капак, чувство како нешто да е во окото, зголемена чувствителност на светлина и заматен вид, пренесува CNN.
Pseudomonas aeruginosa е бактерија отпорна на лекови која може да се шири меѓу луѓето кои немаат симптоми – и луѓето кои не користеле капки за очи, според ЦДЦ. Овој тип на ширење е особено чест во здравствените установи.
„Бактериите можат да се шират кога еден заразен пациент изложува друг пациент, или кога пациентите допираат заеднички предмети или кога здравствените работници шират бактерии, поради што контролата на инфекцијата, како што е хигиената на рацете, е толку важна“, изјави агенцијата за Си-Ен-Ен.
