„Да живее Србија“ се слушнало пред полетувањето на авионот на „Ер Србија“ во кој меѓу 133 патници се евакуираат и Македонци, напиша српски Телеграф и објави видео. Извикот бил одговор на патниците до српскиот конзул во Израел, Душан Вујовиќ, кој претходно им се обратил со следните зборови:
– Драги пријатели, го натоваривме последниот патник. Ви посакувам сè најдобро, убав пат. Ве поздравувам пред амбасадите на Србија, Северна Македонија, деловниот конзулат на Црна Гора и Амбасадата на Албанија од моите драги колеги кои сето ова го организираа на терен. Прво летајте за Скопје, па за Белград, чувајте се и се надевам дека ќе се видиме во подобри времиња.
Видеото од извикот „Да живее Србија“ може да се погледне на следниот линк. Во авионот има и патници од Црна Гора, Србија и од Албанија. Авионот, според информациите на сајтот на ТАВ се очекува на скопскиот аеродром да слета во 15 часот и 15 минути. Од таму авионот треба да се упати кон Белград.
Македонскатa влада вчера соопшти дека ќе ги сноси сите трошоци за летот.
„Во услови на целосно откажани летови и блокиран авиопревоз со Израел, предизвикот за организирање на овој чартер лет беше надминат со соработка со „ Ер Србија “ за превоз на граѓаните кои побараа помош. Авиопревозот што ќе се организира ќе биде бесплатен за граѓаните кои побарале помош“, соопштија од Владата.
Albanian
English
Macedonian
Turkish
