Турските сили го убиле осомничениот лидер на екстремистичката група Исламска држава (ИД) во Сирија, соопшти турскиот претседател Реџеп Таип Ердоган.
Се вели дека Абу ал-Хусеин ал-Хусеини ал-Кураши го презел раководството на екстремната сунитска група Исламска држава (ИД) по смртта на неговиот претходник, Абу ал-Хасан ал-Хашеми ал-Кураши, кој беше убиен за време на судири со непријателските сили минатата есен.
Турскиот претседател Реџеп Таип Ердоган изјави за телевизијата ТРТ Турк дека лидерот на ИД бил „неутрализиран“ во саботата, за време на операција на турската разузнавачка служба МИТ.
Сириски извори цитирани од новинската агенција Ројтерс наведуваат дека операцијата се случила во градот Јандарис во близина на турската граница. Исламистичката група се уште не го коментираше настанот. Ердоган, меѓу другото, рече и дека разузнавачката служба долго време го следела Ал Кураши. „Ќе продолжиме со терористичките организации“, додаде тој.
Да потсетиме, на крајот на ноември Исламската држава преку Телеграм објави дека нивниот претходен лидер Ал Хашеми Ал Кураши е убиен. САД тогаш рекоа дека тој бил убиен во операција на бунтовничката Слободна сириска армија во југозападна Сирија во октомври 2022 година. Американскиот претседател Џо Бајден тогаш рече дека операцијата „отстранила голема терористичка закана за светот“. Ал Хашеми Ал Кураши ја презеде функцијата откако неговиот претходник Абу Ибрахим Ал Хашеми Ал Кураши се разнесе себеси и неговото семејство кога неговото скривалиште беше опколено од американските специјални сили во февруари 2022 година, според Би-Би-Си.
Во летото 2014 година, Исламската држава презеде контрола врз големи делови од северен Ирак и прогласи калифат кој вклучуваше и области во Сирија. Така, таа имаше 88.000 квадратни километри територија под своја контрола и ја наметна својата власт на осум милиони луѓе. Групата беше воено поразена во март 2019 година, но и понатаму е активна во неколку земји на Блискиот Исток, каде што нејзините членови, кои се проценува на меѓу 6.000 и 10.000, продолжуваат да вршат смртоносни напади. Презимето Кураши инаку е поврзано со племето на пророкот Мухамед од кое мора да потекнуваат сите водачи на Исламската држава.
Исламската држава има пунктови и во други конфликтни зони во светот. Се вели дека најконсолидирани мрежи се во Авганистан, Сомалија и басенот на езерото Чад, пишува Би-Би-Си.
