Две христијанки, мајка и ќерка се убиени денеска од израелски снајперист во реонот на католичката парохија на Светото семејство во Газа, соопшти денеска Ерусалимската латинска патријаршија.
Во соопштението се вели дека вчера околу пладне, снајперист на израелските одбранбени сили (ИДФ) убил две христијанки во парохијата на Светото семејство во Газа, каде што повеќето христијански семејства се засолнети од почетокот на војната.
„Нахида и нејзината ќерка Самар беа застрелани и убиени додека оделе до манастирот каде што живеат калуѓерките. Едната била убиена додека се обидувала да ја однесе другата на безбедно“ – се вели во соопштението.
Седум лица биле застрелани и ранети додека се обидувале да ги заштитат другите внатре во цровниот простор, информираа од црквата.
„Тие не дадоа никакво предупредување, никакво известување. Тие беа ладнокрвно застрелани во просториите на парохијата, каде што нема завојувани страни“, соопштија од Ерусалимската латинска патријаршија.
Ватикан Њуз пишува дека нападот бил „оправдан од Израелците кои тврделе дека во парохијата имало ракетен фрлач“.
Парохијата на Светото семејство е единствената Римокатоличка црква во Газа. Од почетокот на војната меѓу Израел и Хамас, стотици христијани и други цивили од Газа се засолниле во парохијата, која се наоѓа на северниот крај на Појасот Газа.
Пред пукањето, од тенк на ИДФ беше истрелана ракета кон манастирот Мајка Тереза, тврдат од Патријаршијата.
„Манастирот е дом на повеќе од 50 лица со инвалидитет и е дел од црковниот круг, кој од почетокот на војната е одреден како место за богослужба. Уништени се генераторот на зградата и неговите извори на гориво, додека 54 лица со инвалидитет во зградата се раселени и немаат пристап до респиратори, кои на некои од нив им се потребни за да преживеат“ – се вели во соопштението.
