Во Грција беснеат пожари, а најлоша е состојбата околу градот Алексадрополис на североистокот на земјата. Но, последиците од пожарот се видливи и на Халкидики кој е оддалечен 200 километри додека лета врана, а не беше поштеден ниту Солун.
Над повеќето одморалишта од Тасос до Солун, видливи се чад, пепел што паѓа и црвеното сонце што се пробива низ облакот од чад и жар.
Туристите се жалат дека чадот им боде очи и го отежнува дишењето.
На социјалните мрежи се појавија бројни фотографии и видеа од последиците од пожарот кој ги зафати и другите региони на Грција, како Евија, Самотраки, Макракоми и Родопи.
Вчера во шумата Дадија на северот од земјава биле пронајдени 18 јагленосани тела, а во самиот Александрополис е евакуирана болница бидејќи до неа стигнал пожарот.
Пациентите и новороденчињата на интензивна нега се префрлени од Универзитетската болница во тој град на траект во пристаништето.
