Србија, единствената европска земја која одби да воведе санкции кон Русија поради нејзината инвазија на Украина, се согласила да го снабдува Киев со оружје или веќе испратила оружје, се вели во доверлив документ на Пентагон, пренесува Ројтерс.
Документот, збир на одговори од европските влади на барањата на Украина за воена обука и оружје, е меѓу десетиците доверливи документи објавени на интернет во последните неколку недели, што може да биде најсериозното оддавање на американски тајни во последните неколку години, според Ројтерс.
Насловен „Европа/одговор на тековниот руско-украински конфликт“, документот ги наведува позициите на 38 европски влади како одговор на барањата на Украина за воена помош.
Списокот покажува дека Србија одбила да обезбеди обука за украинските сили, но ветила дека ќе испрати оружје или веќе го испратила. Се наведува и дека Србија има политичка волја и воена способност во иднина да и дава оружје на Украина.
Документот е класифициран како таен и НОФОРН (Не може да се објави на странски државјани), кој забранува негово дистрибуирање до странски разузнавачки служби и војска. Датира од 2 март и го носи печатот на Канцеларијата на здружениот штаб.
Ројтерс не можеше независно да ја потврди автентичноста на документот. Кабинетот на српскиот претседател Александар Вучиќ и Амбасадата на Украина не одговорија веднаш на прашањата на Ројтерс, како и Пентагон, кој претходно одби да ги коментира објавените документи.
„Ако документот е точен, тој или ја покажува дволичноста на Вучиќ кон Русија или тој е под огромен притисок од Вашингтон да испорача оружје на Украина“, вели Јанус Бугајски, источноевропски експерт од Фондацијата Џејмстаун.
Министерството за правда го истражува истекувањето, додека Пентагон ја проценува штетата за националната безбедност на САД.
Графиконот на Пентагон ги подели одговорите на барањата за помош на Украина во следните категории: земји кои се обврзаа да обезбедуваат вежби и оружје, земји кои веќе обезбедија вежби, оружје или обете, земји со воена способност или политичка волја да „обезбедат идна помош во вооружување “.
Австрија и Малта се единствените две земји означени со „не“ во сите категории.
Производителот на оружје Крушик од Ваљево негираше дека испорачува ракети или друго оружје за Украина. Вучиќ ги нарече тврдењата „позната лага“.
„Не сме испратиле никакво оружје или муниција во Русија или Украина“, рече тој за време на неговата посета на Катар на 5 март.
Ројтерс не може самостојно да ја потврди автентичноста на документацијата за пратката објавена на Telegram. Ројтерс наведува дека Вучиќ уште од почетокот на војната „се обидел да балансира меѓу неговите врски со Москва и неговата цел за влез во ЕУ“. Но, Србија е единствената од 44 европски земји која не воведе санкции кон Русија, според Ројтерс.
