Претседателот на „Достоинство” Стојанче Ангелов денеска до Собранието достави Предлог закон за измена и дополнување на постоечкиот Закон за бранители, со кој треба да се обезбеди обсештетување на 15-тина семејства на загинатите бранители од 2001 година како и на воени инвалиди кои останале необештетни. Тој очекува пратениците да дадат поддршка и повика истиот да се стави на дневен ред и да се изгласа по скратена постапка.
Со овој закон, како што рече, бараат по 70 илјади евра надомест на нематеријална штета за семејства на загинатите кои уште не се обештетени, и по 50 илјади за сто процентен воен инвалидитет.
– Дел од семејствата на загинатите бранители од 2001 година, конкретно 15-тина семејства, како и десетина воени инвалиди до ден денес останаа необештетени.Овој Предлог закон нуди решенија на овој проблем, користејќи ја формулата која што е применета од страна на Владата на Никола Груевски за време на терористичкиот акт во Диво Насеље – изјави денеска Ангелов пред Собранието.
Во овој момент, како што додаде, според податоците постојат само четири воени инвалиди кои не се обештетени. Тој ги повика пратениците од македонски политички блок во Собранието да дадат поддршка, односно да се потпишат за овој Предлог закон да влезе во собраниска процедура.
– Бараме што поголем број пратеници и од позицијата и одпозицијата да се потпишат на нашиот Предлог закон. Очекувам од ВМРО-ДПМНЕ да дадат целосна оддршка на нашата иницијатива. Ние имаме отворена поддршка од лидерот на ВМРО-ДПМНЕ Христијан Мицкоски, но очекувам поддршка и од владина коалиција. Очекувам претседател на Собранието итно да го донесе на дневен ред овој предлог – рече Ангелов.
Тој потсети дека минатиот декември до Владата поднеле иницијатива за надминување на овој проблем, со која што нудат решение за обештетување на 15 семејства и воени инвалиди, но до ден денес оваа инцијатива уште не е разгледана.
– Од разговорите кои ги имав со премиерот Димитар Ковачевски во текот на годината, од него добивме поддршка, а поддршка имаме и од клучните министри за одбрана и внатрешни работи. За жал, проблемот е во политичката партија ДУИ која во Владата во овој момент не дава поддршка на оваа иницијатива, иако на една од коалициските средби лидерот на ДУИ Али Ахмети најави дека ќе се најде решение – рече Ангелов.
Тој потенцира дека доколку иницијативата биде отфрлена, ќе ја напуштат владината коалиција.
Пратеникот од ВМРО-ДПМНЕ Драган Ковачки во изјава за медиумите истакна дека како партија даваат поддршка на иницијативата за обештетување на бранителите, ги повикуваме и останатите партии да дадат поддршка на иницијативата поднесена од претседателот на Достоинство, Стојанче Ангелов.
– Како партија одсекогаш сме давале поддршка на обештетувањето на семејствата на загинатите бранители и на воените инвалиди. Во изминатиот период неколку пати поднесувавме закони, меѓутоа знаете дека истите беа одбивани со договор помеѓу СДС и ДУИ. Како политичка партија даваме апсолутна поддршка на иницијативата која денеска е предложена од страна на претседателот на Достоинство, на Стојанче Ангелов. Ќе ја погледнеме иницијативата, ќе ја разгледаме и истата ќе ја поддржиме. Ги повикуваме и останатите политички партии да се приклучат за да се намали оваа голгота, 20 и неколку годишна голгота на семејствата на загинатите бранители – рече Ковачки.
