Адвокатот на Артан Груби, Владимир Доневски денеска со соопштение до јавноста информира дека до денес не излегле во јавноста бидејќи одбраната, а исто така и гонењето на осомничениот, се води во судска постапка, а не преку медиуми.
„Откако е отпочната оваа кривична постапка, ние како одбрана зедовме активно учество во сите дејствија кои се преземаат. По утврдување на она со кое досега судот располага и анализа на аргументите на јавното обвинителство, според нас нема основи на сомневање за сторено кривично дело предвидено со закон. Одбраната и сите аргументи ќе бидат изложени во рамки на законски предвидената постапка, сѐ со цел да биде убеден и судот и јавниот обвинител дека нема кривично дело во дејствијата за кои се обвинува Артан Груби. Се надеваме дека сите учесници во оваа кривична постапка ќе останат имуни на очигледната политизација на процесот и ќе ја задржат непристрасноста и независноста и одлуките ќе ги носат, како и ние, врз основа на јасни правни аргументи. Со оглед дека судењата се јавни, медиумите и целокупната јавност ќе можат да го следат процесот и сами да донесат заклучок дали постојат докази за утврдување на вина кај Артан Груби“, се вели во соопштението.
Министерството за внатрешни работи во средата распиша меѓународни потерници за поранешниот вицепремиер Артан Груби и за директорот на Државна Лотарија Перпарим Бајрами кои се товарат за проневера на околу осум милиони евра од Државна лотарија.
Двете лица се недостапни за органите на прогонот.
Груби во неделата преку објава на Фејсбук напиша дека е во приватна посета на Косово и дека за тоа е известено неговото лично полициско обезбедување.
