Во последно време зачести употребата на непостоечкиот термин „Северномакедонци“ од страна на претставници на земји – наши пријатели, кои го поддржуваат Преспанскиот договор.
Но, еден од двата клучни столба на компромисот на Преспанскиот договор, е токму самоопределувањето како Македонци кои зборуваат македонски јазик, нешто што самиот Договор го гарантира.
Со други зборови „Северна Македонија” е можна само доколку во неа живеат Македонци, заедно со своите сограѓани и тоа така мора да се почитува.
Затоа секоја употреба на терминот „Северномакедонци” освен што е навреда за Македонците е и подривање на Преспанскиот договор.
Очигледно е потребен далеку посериозен фокус на нашата дипломатија за овој недвосмислен наратив да се промовира во меѓународните односи и да се превенира оваа појава бидејќи се чини дека во последниве месеци тоа никој не го работи.
Тоа е недозволиво.
Особено имајќи предвид дека во овој период една земја членка на ЕУ и наш сосед директно го негира токму македонскиот идентитет и јазик
Мора да се работи и проактивно, но и редовно и ажурно да се реагира на секоја погрешна употреба без исклучок се’ додека меѓународната пракса не биде целосно на линија со одредбите на Договорот.
(статус на Фејсбук на Никола Димитров)
Вчера, Габриел Ескобар, заменик-помошникот на државниот секретар на САД, задолжен за Европа и Евроазија, на брифингот посветен на Западен Балкан, говорејќи за историската, културната и економската припадност на Македонците, ја употреби придавката „Северномакедонци“.
– Северномакедонците се Европејци, тие историски се Европејци, културолошки се Европејци и економски Северна Македонија е дел од Европа и е важен и ќе биде важен учесник во делот на транспортот ИТ секторот, па се до енергетскиот сектор – рече Ескобар.
Пред нешто повеќе од еден месец и францускиот претседател Емануел Макрон не нарече „Северномакедонци“, по што министерот за надворешни работи Бујар Османи ја смируваше јавноста дека е контактирано со француската амбасада и дека „Макрон апсолутно направил ненамерна грешка“.
