Британскиот премиер Борис Џонсон изјави дека Западот мора да продолжи да ги поддржува Украинците додека тие се обидуваат да ја вратат територијата заземена од Русија, нагласувајќи дека ќе биде „катастрофа“ доколку рускиот претседател Владимир Путин може да тврди дека победил, јави ДПА.
Говорејќи на неговото враќање во Лондон по ненајавената посета на Киев, премиерот предупреди дека Украина не треба да се охрабрува да прифати „лош мир“ што едноставно ќе биде увертира за обновена руска офанзива.
Џонсон рече дека е важно да се покаже поддршката на Лондон во време кога Украинците „ужасно страдаат“ пред тековната руска офанзива во Донбас.
– Мислам дека е многу важно да се оди во Украина во особено критично време. Загриженоста што ја имаме е дека малку замор од Украина почнува да се појавува низ целиот свет – рече тој.
– Многу е важно да покажеме дека сме со нив на долг рок и им ја даваме стратешката издржливост што им е потребна – додаде премиерот.
Во неговите разговори со претседателот Зеленски, Џонсон рече дека Британија ќе биде подготвена да обучи десетици илјади украински војници додека тие продолжуваат да се борат против Русите.
Тој додаде дека Украинците треба да бидат поддржани во нивната амбиција да ја вратат територијата окупирана од руските сили откако извршија инвазија во февруари.
