Американскиот претседател Џо Бајден во понеделникот изјави дека планира да се кандидира и на изборите следната година, но дека се уште не е подготвен официјално да го објави тоа.Планирам да се кандидирам за функцијата, но сè уште не сме подготвени да го објавиме тоа, изјави 80-годишниот американски претседател во интервју за телевизијата NBC.
Досега петмина кандидати официјално ја објавија својата кандидатура за претседателските избори следната година.
Меѓу републиканците, тоа се поранешниот претседател Доналд Трамп, поранешната амбасадорка на САД во Обединетите нации Ники Хејли, бизнисменот „анти-буден“ со индиско потекло Вивек Рамасвами и поранешниот гувернер на Арканзас Аса Хачинсон, пишува Њујорк Тајмс.
NY Times наведува дека се очекува и кандидатурата на Рон Де Сантис, кој се смета за најголем ривал на Трамп, а покрај гувернерот на Флорида, американските медиуми ги споменуваат и поранешниот потпретседател Мајк Пенс, поранешниот државен секретар Мајк Помпео и сенаторот Тим Скот.
Од демократската страна, Маријана Вилијамсон, поранешната духовна советничка на Опра Винфри, која во својата последна кандидатура во 2020 година повика на формирање министерство за мир и исплата на репарации за ропство, ја објави својата кандидатура.
Ројтерс минатата недела напиша дека на изборите ќе се кандидира и демократот Роберт Кенеди Јуниор, адвокат и скептик за вакцините и американската надворешна политика, внук на убиениот американски претседател Џон Кенеди.
