Пејачот Џастин Бибер се приближува до договорот за продажба на своите музички права на „Хипгнозис сонгс капитал“ (Hipgnosis Songs Capital) за околу 200 милиони долари, потврдија извори за „Вариети“, а веста за која се шпекулира со недели, првпат ја објавија „Хитс“ и „Волстрит журнал“.
Договорот, за кој изворите велат дека сè уште не е склопен, ги вклучува уделите на Бибер во неговото издаваштво и каталогот на снимена музика, а извори велат дека и понатаму ќе биде управуван и во сопственост на „Универзал“ дури и ако договорот се заклучи.
Веста пристигнува во тешкиот период за пејачот, само неколку недели откако тој ги одложи преостанатите датуми од својата турнеја „Правда“ (Justice) „на неодредено време следната година“. Турнејата, која првично требаше да започне во 2020 година, неколкупати беше одложувана, првично поради пандемијата, а последен пат по неговата борба со синдромот Рамзи Хант, редок вирус кој во неговиот случај предизвикал парализа на лицето.
Конечно започнал во март и го покрива поголемиот дел од Северна Америка, но Бибер ги одложи преостанатите датуми на почетокот на јуни, откако ја објави својата борба со болеста. Доаѓа и во услови на општо заладување на неодамна загреаниот пазар на каталози, кој стана помалку атрактивен бидејќи бараните цени скокнаа, а каматните стапки и даноците на капиталната добивка се зголемија.
Каталогот на Бибер, иако содржи акции од неговите хитови во последните 15 години, исто така е помалку докажан од некои други, како оној на Џенезис и Фил Колинс, кој беше продаден за 300 милиони долари претходно оваа година.
Сепак, некои компании, особено „Хипгнозис“, прифатија понови каталози. Според „Волстрит журнал“, договорот со Бибер би бил најголемото стекнување на музички права на „Хипгнозис“ досега. На почетокот на оваа година, компанијата ги стекна правата на каталогот на песни на Џастин Тимберлејк, во договор, наводно, вреден нешто повеќе од 100 милиони долари.
Од друга страна, „Хипгнозис“ го има набавено и каталогот на легендарниот кантавтор Леонард Коен, кој вклучува многу класици постари од 50 години. Пазарот на музички каталози го достигна својот врв во 2020 година и минатата година кога Боб Дилан и Брус Спрингстин ги продадоа своите каталози за 300, односно 500 милиони долари.
