Бугарскиот контроверзен европратеник Ангел Џамбаски ја обвини македонската Влада дека започнала голема лобистичка офанзива во Европа.
„Координиран напад организиран од властите во Скопје. Додека Европскиот парламент започнува со разгледување на извештајот за Северна Македонија, Владата во Скопје започнува голема лобистичка офанзива во Европа. Нејзината крајна цел, се разбира, е Скопје да не направи никакви промени во односите со Бугарија и со тоа да игра со Брисел. Работи намерно против Бугарија, само на штета на Бугарија“, напиша Џамбаски на Фејсбук.
Тој потсети дека македонскиот премиер, Димитар Ковачевски, жестоко ја нападнал Бугарија на Советот на Европа во Рејкјавик. Исто така, додава тој, и претседателот Пендаровски го потврдил постоењето на „црни списоци“ за Бугарите да не се дозволуваат на територијата на Северна Македонија.
„Инаку, јас и мојот колега Андреј Ковачев од ЕПП сме на овие листи затоа што таму се бориме за правата на Бугарите. Во Европскиот парламент се одржаа голем број средби на вицепремиерот на Северна Македонија, каде што тој си дозволи да им се наметне на европските претставници, се сликаше со моите колеги од Комисијата за надворешни работи и на тој начин се обиде да им предложи нешто што ќе се случи во следните денови“, пишува тој.
Иако извештајот не ги одразува целосно бугарските приговори за политиката на Скопје кон Бугарија, како што вели Џамбаски, има многу критични наоди кои ја обврзуваат Северна Македонија да преземе промени за да добие право за почеток на преговори за членство во Европската Унија.
„Поради оваа причина, сите колеги кои беа вклучени во оваа манипулација и овој тотален обид за лобирање должат одговори. Време е европските институции јасно да покажат дали ќе поддржат земја во која има забранети луѓе. Затоа што во Северна Македонија живеат граѓани кои се прогонувани, репресирани и тепани поради нивното потекло и храброста да се изразат слободно. Следува месец во кој многу ќе се зборува за човекови права. Сепак, ќе биде огромен срам и тешко лицемерие ако бриселските власти замижуваат пред злосторствата на режимот во Скопје, како што ги затворија очите пред злосторствата на Кремљ“, напиша бугарскиот политичар.
