Деветнаесет годишниот напач во основното училиште „Пречко“ во Загреб; кој уби едно дете, а неколкумина рани со нож; бил ученик во тоа училиште и моментално живее во близина на училиштето, изјави попладнево хрватскиот министер за внатрешни работи Давор Божиновиќ.
– Шокирани сме од овие настани, 19-годишен млад човек влегол во училиштето и со остар предмет ги нападнал професорката и учениците. Едно дете починало, додека, пак, уште тројца повредени се испратени во медицински установи. Наставникот и напаѓачот се во болница и на сите лица им е укажана лекарска помош. Сторителот е 19-годишник кој бил ученик во тоа училиште и моментално живее во близина на тоа училиште – рече тој.
Насилникот бил совладан 10 минути по пријавувањето на настанот.
– Тој почнал да си нанесува повреди, исто така со нож. Се сокрил во блиските простории на Здравствениот дом. Полицијата го спречила да се самоубие – кажа министерот.
Според информациите на полицијата, лицето имало психички нарушувања. Пред околу една година тој се обидел да се самоубие.
– Тешко е да се каже дека личноста била психички урамнотежена – додаде Божиновиќ.
Министерот за образование, Радован Фукс, изјави дека детекторите за метал се непрактични во училиштата бидејќи проверката би траела со часови. Ова училиште, како што рече, има и видео надзор.
– Не станува збор за ученик или за терористички чин. Колку што знам, училиштето било отклучено и тој влегол – рече министерот.
Хрватските медиуми објавија дека наставничката е оперирана и во моментов не е во животна опасност. Меѓу повредените има и 15-годишно момче кое моментално е на операција, но не е во животна опасност. Другите две деца се на возраст од 11 и 7 години и се полесно повредени.
Министерката за здравство, Ирена Хрстиќ, претходно денеска изјави дека е згрозена од нападот и изрази сочувство до семејството на починатото дете, а за повредените рече дека се пренесени во болница и во овој момент сите се надвор од животна опасност.
Загрепската полиција извести дека утринава, нешто пред 10 часот, млад човек со остар предмет, можеби нож, повредил наставник и неколку ученици во воспитно-образовна установа „Пречко“.
„Напаѓачот е под надзор на полицијата. На повредените им се укажува лекарска помош“, соопштија од полицијата.
