Десетици војници од 26 земји деноноќно работат во германска касарна во градот Штутгарт за да достават оружје во Украина. Тука се решава сѐ. Од оваа просторија, западните сојузници веќе помогнаа во снабдувањето со оружје и муниција во вредност од речиси 8 милијарди долари за вооружените сили на Украина. Тоа се 66.000 тони, што е еквивалент на 5.000 лондонски двокатни автобуси, споредува еден британски офицер.
Повеќето од она што се случува во касарната „Пач“ е врвна тајна. Тамошните Украинци се дел од Меѓународната единица за координација на донатори (ICPD). До овој воен центар каде се кршат копјата околу снабдувањето успеале да стигнат од Би-Би-Си.
Го носиме оружјето до граница, Украинците имаа 48 часа
Ситуацијата во Донбас изгледа сè помрачна, но овде во Штутгарт постои чувство на итност наместо паника. Мал украински тим предводен од еден генерал разви база на податоци во која Украинците можат да ги постават своите приоритети. Земјите донатори можат да пристапат до овие информации и да одлучат што сакаат и што можат да обезбедат.
Бригадниот генерал Крис Кинг, висок британски офицер, вели дека воената помош се доставува по воздушен, пат, железнички и поморски пат и на неколку одредени места „за да се осигураме дека немаме единствени точки на неуспех“. Тој вели дека Русија се обидела да ги засили нападите на линиите за снабдување, но немало „значително“ прекинување.
Задачата за транспорт на оружје и муниција преку граница им е препуштена на самите Украинци.
– Во Полска и во другите земји, Украинците доаѓаат и го земаат, така што тие се оние кои одредуваат како оружјето ќе ја помине границата. Откако тоа ќе ја помине границата, тие имаат рок да пристигнат на линијата на фронтот во следните 48 часа – вели адмиралот Дјук Хајнц, висок американски командант во касарната.
Убеден сум, нема доволно муниција
Неодамна од Украина се слушнаа алармантни предупредувања дека протокот на оружје е премал и дека е предоцна. Додека Русија продолжува да го бомбардира Донбас, барањата за поголема помош звучат се поочајни секој изминат ден. Заменик-министерот за одбрана на Украина вели дека земјата досега добила само 10 отсто од она што го побарала.
Овде во Штутгарт, контраадмиралот Хајнц потврдува:
– Убеден сум дека нема да имаат доволно муниција.
Барањата на Украина значително се променија во последните неколку месеци. На почетокот на војната САД и Велика Британија испратија мало оружје и муниција, како што се противтенковски и противвоздушни ракети. Сега Украинците сакаат потешко оружје – артилерија, ракети и системи за противвоздушна одбрана.
Време е да се напушти советското оружје
Во раните денови на војната, се складираше старо советско оружје и муниција од поранешниот советски блок, истите системи што вооружените сили на Украина ги користеа со децении. Но, овие залихи полека се трошат. Во моментов има само една фабрика во Европа која произведува советска артилериска муниција компатибилна со 152 милиметри. Таа полека се префрла на опрема која ги задоволува стандардите на НАТО.
Во последните неколку месеци во Украина се испратени повеќе од 100 американски хаубици М777 и 300.000 парчиња муниција за артилериски гранати од 155 милиметри. Ова претставува дополнителен предизвик, бидејќи украинските сили треба да бидат обучени како да користат оружје и муниција. Оваа обука се организира надвор од Украина. Некои украински војници веќе се обучуваат во Велика Британија да работат со нови артилериски топови и ракетни фрлачи обезбедени од Британија. Поедноставните системи може да се решат виртуелно користејќи видеа и упатства.
Ќе го посееме семето на идниот конфликт?
Ниту адмиралот Хајнц, ниту бригадниот генерал Кинг не веруваат дека оваа војна брзо ќе заврши. Според Кинг, таа ќе трае со години.
Но, има луѓе во НАТО кои се прашуваат дали Западот е навистина подготвен за војна која би можела да трае со години. Хајнц ја опишува мисијата за снабдување на Украина со оружје и муниција како „најважната работа што оваа команда ја направила“ откако Европската команда предводена од САД (EUCOM) е основана во 1952 година.
Бригадниот генерал рече дека изборот бил суров:
– Или ќе ѝ помогнеме на Украина да се бори или ќе прифатиме дека можеби не веднаш, но во следните неколку години ќе се бориме на друго место. Ако не направиме доволно, ќе го посееме семето на идниот конфликт.
