Британскиот министер за одбрана Бен Волас ги отфрли тврдењата на неговиот руски колега Сергеј Шојгу дека Киев со помош на Западот планира акции што ќе го ескалира конфликтот во Украина, соопшти денеска британското Министерство за одбрана.
„На барање на руското Министерство за одбрана, министерот Бен Волас попладнево разговараше со неговиот руски колега Шојгу. Рускиот министер тврди дека Украина планирала дејствија со помош на западните земји, вклучително и Британија, кои би го ескалирале конфликтот во Украина. Министерот Волас ги отфрли тие тврдења и предупреди дека таквите обвинувања не треба да се користат како изговор за понатамошна ескалација”, се вели во соопштението на британското МО на Твитер.
Волас повторил дека Британија и „пошироката меѓународна заедница” ја поддржуваат Украина и дека сите сакаат конфликтот да се деескалира.
„На Украина и Русија е да бараат решение, а Британија е подготвена да помогне”, се вели во соопштението.
