Бригадите Касам на Хамас се заканија дека ќе ги погубат израелските затвореници доколку Израел продолжи да бомбардира и да убива цивили во Газа.
– Секое таргетирање на невини цивили без предупредување, за жал, ќе биде придружено со егзекуција на еден од затворениците во нашиот притвор, а ние ќе бидеме принудени да го емитуваме тоа. Жалиме за оваа одлука, но сметаме дека непријателот Израел и нивното раководство се одговорни за ова – рече Абу Обеида, портпарол на бригадите Касам на Хамас, пренесува Ал Џезира.
Шефот на израелската дипломатија Ели Коен денеска изјави дека повеќе од 100 луѓе биле заробени од Хамас во смртоносниот прекуграничен напaд за време на викендот и дека тие сега се наоѓаат во Газа. Тој додаде дека бројот на мртвите на израелска страна се искачил на 700.
По објавата дека бригадата Ал-Касам се заканува со егзекуција на затворениците и известувањето дека Израел ќе продолжи да ја бомбардира Газа дури и по цена да ги загрози израелските заложници, нивните животи сега се во крајна опасност.
На 7 октомври утрото палестинската исламистичка група Хамас изврши масовен напад врз Израел, при што загинаа повеќе од 700 луѓе, а повредени се 2.400 лица. Помеѓу убиените има и странски државјани.
Израел официјално прогласи воена состојба првпат по војната во Јом Кипур во 1973 година и одговори со воздушни напади врз палестинската енклава.
