Додека во Нови Сад втор ден по ред траат блокадите и протестите пред судот и пред обвинителството, опозицијата во Белград паралелно има протест и блокада на стариот Савски мост, а најавена е и блокада на Бранков мост.
Во Нови Сад денеска се одржува втор ден од блокадата на судот и на обвинителството со цел да се побара пронаоѓање на одговорните за трагедијата во овој град, како и да се ослободат политичарите и активистите кои беа затворени за време и по протестот поради падот на натстрешницата на Железничката станица.
Блокадата ја одбележаа бројни инциденти. Реагираше и министерката за правда Маја Поповиќ која ја оцени блокадата како „притисок врз судството досега невиден во историјата на Србија“.
Паралелно во Белград, лидерот на движењето „Крени-промени“, Саво Манојловиќ, и градскиот советник на движењето, Александар Јовановиќ, беа приведени утрово на протестот на стариот Савски мост во Белград каде што група активисти се обидоа да го спречат отстранувањето на трамвајските шини од коловозот во повеќемесечните протести против затворањето и демонтирањето на мостот.
Министерот за внатрешни работи, Ивица Дачиќ, денеска изјави дека Саво Манојловиќ се обидел да го пробие полицискиот кордон на стариот Савски мост и затоа реагирала полицијата. Од двете страни на мостот беа распоредени полициски кордони опремени за разбивање на демонстрациите.
Претседателот на Демократската партија (ДС), Зоран Лутовац, денеска ги повика граѓаните напладне да се соберат и пред Бранковиот мост за да го одбранат уривањето на стариот Савски мост. Ѓорѓе Микетиќ, активист на иницијативата „Мостот останува“, повика на акција, наведувајќи дека „акцијата е неопходна бидејќи властите околу 4 часот утринава почнаа целосно незаконски да ги отстрануваат шините на стариот Савски мост“.
– Она што се случува денеска пред судот и пред обвинителството во Нови Сад и овде, на стариот Савски мост, е соголување на диктатурата – подвлече Микетиќ.
Тој ги повика граѓаните денеска напладне да се соберат на Бранков мост и да го блокираат со автомобили, со велосипеди и пеш.
Министерот за внатрешни работи, Ивица Дачиќ, изјави дека Министерството за внатрешни работи на Србија ги предупредува учесниците на протестните собири дека нема да толерираат нарушување на јавниот ред и мир, загрозување на безбедноста на земјата и државните институции, како и напади врз полицијата.
За пладне, како што денеска соопштија од Кабинетот на српскиот претседател Александар Вучиќ, закажана е и седница на Советот за национална безбедност, без да се наведе причина за свикување на седницата.
