Бисера Антоанета со народни пари вечерала бизонско филе, телешко карпачо и школки за 400 евра во луксузен ресторан во Виена, открива денеска Миле Лефков, портпарол на ВМРО-ДПМНЕ.
– Покрај лускузниот трособен стан за 4 ноќи, платен 1.200 евра, Антоанета јадела луксузно. На една од сметките кои Бисера Антоанета ги доставила до Министерството за култура и за која зела државни пари се гледа дека за една вечера потрошила 403 евра – таа вечера ја платиле граѓаните. Антоанета вечерала во луксузниот виенски ресторан „Дистрикт“, а на нејзината маса се нашле школки, бизонско филе, телешко карпачо – сето тоа платено од народот – вели Лефков.
Пратеникот открива дека поранешната министерка за култура Бисера Костадиновска Стојчевска не штедела ниту во ресторанот „Соле“, каде за еден ручек платила 249 евра, а за вечера во истиот ресторан 212 евра. Овде на менито на Антоанета била италијанска храна.
– Само за овие три ресторански посети Бисера Антоанета платила 846 евра или 53.136 денари. Да, добро слушате, Бисера Антоанета за еден ручек и две вечери со народни пари платила колку што изнесува месечна потрошувачка кошничка за цело семејство. Ја прашуваме Бисера Антоанета дали овие трошоци биле нужни? Дали можело поевтино? Зошто ги одбрала овие ресторани? Како правда 3.000 евра трошок за 4-дневно патување во Виена – рече Лефков.
