Белата куќа има негативно мислење за наводниот план на поранешната НБА ѕвезда Денис Родман да отпатува во Русија и да обезбеди ослободување на американската кошаркарка Бритни Грајнер, пишува Ројтерс, повикувајќи се на извор запознаен со ситуацијата.
Грејнер, двократен олимписки шампион и ѕвезда на ВБНА, беше осуден на девет години затвор во Русија на почетокот на овој месец под обвинение за поседување дрога.
Американскиот претседател Џозеф Бајден ја осуди пресудата како „неприфатлива“, а САД и понудија на Русија да го размени Виктор Бут, руски трговец со оружје, кој отслужува 25-годишна затворска казна во Америка, за Грајнер, пренесува Гласот на Америка.
Родман изјави за NBC News дека планира да ја посети Русија за да побара ослободување на Грајнер.
„Добив дозвола да одам во Русија и да и помогнам. Се обидувам да одам оваа недела“, изјави Родман за NBC, кој сепак не објасни од кого кошаркарот ја добил дозволата.
Висок претставник на администрацијата, кој побара да остане анонимен, јасно стави до знаење дека Белата куќа не ја одобрува најавената посета.
„Постои јавно сознание за значајната понуда на администрацијата до Русите, и сè надвор од понатамошните преговори преку веќе воспоставените канали веројатно ќе ги комплицира и ќе ги попречи напорите за ослободување“, изјави претставникот за Ројтерс.
Тој исто така истакна дека Стејт департментот ги советува Американците да не патуваат во Русија.
Стејт департментот објави дека Родман не оди во Русија во име на американската влада и дека се разговара за можна размена на затвореници.
Родман во минатото се обиде да се вклучи во меѓународната дипломатија. Поранешниот кошаркар е меѓу неколкуте Западњаци кои се сретнале со севернокорејскиот лидер Ким Џонг Ун.
