Членот на Претседателството на Босна и Херцеговина, Денис Беќировиќ, разговараше во Конгресот на Соединетите Американски Држави (САД) со угледниот конгресмен Мајкл Тарнер од сојузната држава Охајо, јавува Анадолија.
Беќировиќ во разговорот укажа на важноста од посилна вклученост на американската администрација во Босна и Херцеговина.
Беше посочено дека силната поддршка на Соединетите Американски Држави за влез на Босна и Херцеговина во НАТО и Европската Унија е гаранција за мирот и безбедноста во регионот.
Беше истакнато дека новите геополитички околности ја диктираат потребата од нов и порешителен ангажман на Западот кон Босна и Херцеговина и регионот.
Беќировиќ изјави дека санкциите против одредени политичари во Босна и Херцеговина не се најсреќното решение, но дека се неопходни во случаи кога поединци, како Милорад Додик, ги загрозуваат основите на Дејтонскиот мировен договор.
Тој додаде дека е подобро да се санкционираат неодговорни поединци отколку да им се дозволи да го загрозат мировниот процес.
Беќировиќ се заблагодари за досегашната поддршка и помош на реформските напори на Босна и Херцеговина на патот кон евроатлантските интеграции, борбата против корупцијата и воспоставувањето на владеење на правото.
Тој изрази очекувања за продолжување на проактивната улога на САД и поддршка во спроведувањето на реформите кои се клучни за функционалноста и стабилноста на Босна и Херцеговина.
Конгресменот Тарнер заедно со сенаторот Мекејн е најзаслужниот член на Конгресот за приемот на Црна Гора во НАТО.
Тој беше градоначалник на градот Дејтон во времето на преговорите во истоимената воена база на периферијата на градот.
Член е на Клубот на пријатели на Босна и Херцеговина во Американскиот Конгрес.
