Јужен Бејрут беше цел на денешниот напад, кој дојде веднаш откако израелската армија ги предупреди жителите на јужните делови на либанската престолнина, која се смета за упориште на шиитското движење Хезболах, да се повлечат на безбедно.
Либанските власти соопштија дека шест лица загинале во еден од израелските напади јужно од главниот град.
Снимката од последниот напад покажува облак црн чад што се издига над областа околу еден час откако израелската армија ги повика жителите на делови од јужните предградија на Бејрут веднаш да ја напуштат областа.
„Вие сте во близина на објекти и интереси поврзани со Хезболах, против кои израелските одбранбени сили ќе преземат акција во блиска иднина“, рече портпаролот на армијата Авихај Адрае на социјалната мрежа Х, притоа објавувајќи и мапа на целните области.
Ова беше трето вакво предупредување до жителите издадено од израелската армија во рок од 24 часа, пренесува француската новинска агенција АФП.
Либанските власти денеска соопштија дека израелските сили ја нападнале густо населената област Арамун јужно од Бејрут, која не е меѓу областите поврзани со Хезболах. Најмалку шест лица загинаа, а 15 се повредени во нападот, соопшти Министерството за здравство.
Повеќе од 3.200 луѓе се убиени, а повеќе од 14.200 ранети во израелските напади врз Либан од ескалацијата на конфликтот со Хезболах минатиот октомври, по почетокот на војната во Појасот Газа.
Нападите одзедоа огромно мнозинство од животите откако Израел почна со големи бомбардирања на јужниот и источниот дел на Либан на земјата кон крајот на септември, како и на јужните предградија на Бејрут.
