На американскиот претседател Џо Бајден во февруари му била отстранета кожна лезија од градите, која била карцином на базалните клетки – вообичаена форма на рак на кожата, изјави лекарот од Белата куќа Кевин О’Конор.
– Целото канцерогено ткиво беше успешно отстрането – изјавиО’Конор.
Бајден ќе биде под лекарски надзор и понатаму, но според лекарот не е потребен дополнителен третман. О’Конор вели дека областа каде што била отстранета канцерогената лезија „добро зараснала“.
– Лезиите на карцином на базалните клетки немаат тенденција да се ‘шират’ или да метастазираат, како што е познато дека прават некои посериозни карциноми на кожата, како што се меланом или сквамозен карцином – објасни О’Конор.
Белата куќа на 17 февруари го сподели извештајот на д-р О’Конор со детални информации за здравјето на Бајден, кои често се на дневен ред во американската јавност, бидејќи тој има 80 години.
