Пукањето на Трамп „нè повикува сите да направиме чекор назад. За среќа, Трамп не е сериозно повреден“.
Ова го рече претседателот на САД, Џозеф Бајден, за време на неговото обраќање на нацијата од Белата куќа.
– Не можеме да дозволиме да се нормализира ова насилство. Политичката реторика во оваа земја е многу вжештена. Време е да се смири. Сите имаме одговорност да го направиме тоа. Во Америка несогласувањата ги решаваме на гласачка кутија. Така го правиме тоа. На гласачка кутија. Не со куршуми – истакна Бајден во говорот долг околу седум минути, пренесе Ројтерс.
Бајден третпат коментира на прашања од големо значење за Американците од формално уредената Овална соба, откако тој ја презеде функцијата во 2021 година.
Настапот му овозможи на Бајден да ја покаже моќта на функцијата што е важна симболична слика додека се бори со некои, во сопствената Демократска партија, кои сакаат 81-годишниот лидер да се повлече од кандидатурата за реизбор поради загриженоста дека нема ментална острина за уште еден 4-годишен мандат.
Четворица американски претседатели се убиени, а неколкумина избегнале обиди за атентат. Застрелани се повеќе претседателски кандидати, од кои некои фатално.
– Насилството никогаш не било одговор – додаде тој.
Бајден ретко се обраќа од Овалната соба. Минатиот октомври, одржа говор во ударен термин за да ги коментира конфликтите во Газа и во Украина, а во јуни 2023 година зборуваше кога беше постигнат договор со републиканците за да се избегне пробивање на горната граница на американскиот долг.
Бајденовата кампања ги откажа вербалните напади врз поранешниот претседател за да се фокусира на иднината. Неколку часа по пукањето во саботата, кампањата ги повлече телевизиските реклами и ги прекина другите политички комуникации.
– Вечерва барам од секој Американец повторно да се обврзе. Омразата не смее да има безбедно пристаниште – рече американскиот претседател.
Но, тој рече и дека е сосем фер да ѝ се спротивстави на визијата на поранешниот претседател со сопствената и дека планира да го стори тоа наскоро.
