Автомобилската индустрија профитира од високите цени на автомобилите, а во текот на следната година се очекува продажбата да се зголеми за 7,5 отсто, објави консултантската компанија Horváth врз основа на истражувањето што го спроведе.
Автомобилската индустрија гледа оптимистички кон 2023 година, во која се очекува значителен раст на продажбата, се вели во соопштението за печатот на споменатиот консултант, со дополнение дека менаџерите од автомобилскиот сектор проценуваат дека растот на продажбата во следната година ќе биде поголем од просекот на други индустрии и ќе се движи околу 7 ,5 проценти. Истражувањето е спроведено во 18 земји, меѓу кои и Хрватска.
Марија Болдор од консултантската фирма Horváth укажува на оптимизам поради големата побарувачка за сите видови возила, нови и користени.
„Доколку се намалат тесните грла во синџирите на снабдување, реално е да се очекува висок раст на продажбата во следната 2023 година од 7,5 отсто. Сепак, без оглед на сите тешкотии, производителите на возила и понатаму остваруваат високи профити оваа година поради повисоките продажни цени“, изјави Болдор.
Автомобилската индустрија брзо закрепна по пандемијата, па веќе во 2021 година е забележан натпросечен раст на продажбата од 15,5 отсто. Продолжувањето на ваквиот брз раст беше спречено од проблемите во синџирите на снабдување, но зголемувањето на цените на автомобилите и овозможи на индустријата релативно удобна позиција.
„Недостигот на материјали, особено полупроводници, негативно се одразува на продажбата, па оваа година се очекува раст на продажбата од само пет проценти, што е значително помал од другите индустриски сектори“, вели Болдор.
Поради сето ова, оптимизацијата на трошоците и приходите останува високо на приоритетната листа на менаџери во автомобилската индустрија, кои продолжуваат со забрзана работа на дигитална трансформација, еколошка одржливост и е-мобилност, се вели во соопштението за медиумите.
