Авион на американскиот марински корпус кој леташе по дождливо време ја промаши пистата во воената база на Хаваи и се урна во заливот Канеохе, но сите девет членови на екипажот останаа неповредени, соопштија властите.
Крајбрежната стража одговори на повикот за помош, но спасувачките операции набрзо беа прекинати синоќа бидејќи се чини дека сите инволвирани се спасени, изјави портпаролот на крајбрежната стража Рајан Фишер.
Портпаролот на Маринскиот корпус, наредникот Орландо Перез изјави дека нема информации зошто P-8A Poseidon ја промашил пистата во базата на Маринскиот корпус на Хаваи.
Противпожарната служба во Хонолулу добила повик за авионската несреќа веднаш по 14 часот по локално време, изјави портпаролот.
Времето беше облачно и врнежливо, а видливоста беше околу 1,6 километри, изјави метеорологот Томас Вон од Националната метеоролошка служба во Хонолулу.
Базата на Маринскиот корпус на Хаваи е на околу 10 милји од Хонолулу на островот Оаху. Во базата има околу 9.300 воени лица и 5.100 членови на семејството. Тоа е една од клучните воени инсталации на островот Оаху.
Базата гледа на заливот Канеохе, богат со корални гребени и дом на ајкули со чекан. Таму се наоѓа и Институтот за истражување на морска биологија на Универзитетот на Хаваи.
