Атентаторот на американскиот екс-претседател Доналд Трамп, Рајан Рут, повеќепати бил одбиван од украинската војска каде сакал да волонтира, а причините, според извори за британски „Телеграф“, се неговата тврдоглавост, но и неговата возраст од 56 години.
– Неколку пати беше повикан од луѓето од (украинската Меѓународна) легија и тие му рекоа да прекине со неговите шеги, но се чинеше дека тоа не го спречи. Тој беше прилично ексцентричен. Можев да намирисам на километар дека е полн со гомна – вели поранешен функционер на Легијата за британскиот весник.
Во интервју за „Фајненшл Тајмс“, самиот Рут признал дека Легијата го одбила поради возраста.
– Ми рекоа: „Имаш 56 години, стар си и немаш искуство“ – изјави тој за весникот.
Тоа не го спречило Рут да тврди дека е активен регрутер за Легијата на социјалните мрежи. Тоа било лесно во првите месеци на војната и имало и многу други такви „самоиздавачи“ од странство, вели изворот од Легијата.
– Тој се обидуваше да се вклучи и во внатрешни работи. Ми праќаше пораки велејќи: „Ох, момците во оваа единица не се среќни“. Беше целосно нестабилен – додава изворот.
Атентаторот на Трамп дури и подигнал редовен споменик на Плоштадот на независноста во Киев и своевремено нудел лажни флаери на кои пишувало дека секој што ќе крене оружје против Русија ќе добие 1.200 долари. Ова траело сè додека украинските власти не забраниле да се раздаваат флаерите.
Според „Фајненшл Тајмс“, откако неговиот импровизиран споменик во Киев бил симнат, тој во блискиот парк започнал да боцка мали украински знаменца во знак на загинатите Украинци. Паркот сега е дом на илјадници знамиња кои станаа своевидно обележје на плоштадот.
Сепак, Легијата не го одобрува атентатот врз американскиот екс-претседател Трамп, па сега украинските власти се думаат што ќе прават со паркот во случај Трамп идната година да го посети Киев во својство на нов претседател на САД.
Меѓународната Легија на Украина е единица создадена од украинскиот претседател Володимир Зеленски. Проектот привлече илјадници кандидати од странство во првите месеци од војната.
