Во текот на ноќта американската војска изврши нов бран ракетни напади од бродови и подморници на локации во Јемен под контрола на Хутите, што е четврти пат американската војска директно да ги гаѓа нивните позиции во Јемен во последните неколку недели.
Нападите беа лансирани од Црвеното Море и погодија 14 проектили кои командата на американската војска ги оцени како „непосредна закана“, пренесува АП.
„Силите погодија 14 проектили на Хути, поддржани од Иран. Проектилите беа на лансирни патеки и претставуваа непосредна закана за американските трговски и поморски бродови во регионот. Тие можеа да бидат испалени во секое време, што ги натера американските сили да го искористат своето право и обврска да се бранат“ – се вели во соопштението од американската војска.
Хутите претходно ја презедоа одговорноста за нападот на американскиот товарен брод, за кој тврдат дека бил погоден директно.
