„Северномакедонските“ партии протестирале против францускиот предлог кој е голем успех за бугарската влада, смета бугарскиот премиер во заминување, Кирил Петков во радио-интервју за БНР, негде по 39-та минута од разговорот. Според него, Бугарија направила „нешто неверојатно“ со неговото одобрување во парламентот по кое Софија веќе е ослободена од одговорност, а Брисел за првпат ја поддржал бугарската позиција во спорот.
– Ако Северна Македонија се согласи со францускиот предлог, во Уставот на Северна Македонија ќе влезат Бугарите пред да почне преговарачкиот процес. Второ, имаме јасни контролни механизми за говорот на омраза и за дискриминацијата. Трето, имаме многу јасни дефиниции за историските факти и образованието во училиштата во Северна Македонија – изјави Петков, додавајќи дека зад спроведувањето ќе стои Брисел.
