Премиерот на Црна Гора Дритан Абазовиќ објави официјални фотографии од тунел кој бил ископан до депото на Вишиот суд во Подгорица каде се чуваат докази, што неодамна го откри црногорската полиција. Откако го виде тунелот Абазовиќ рече дека тој не можел да биде ископан без помош на луѓе од самиот суд, пренесува Нова.
„Со земјата никогаш повеќе нема да владее мафијата“, напиша тој на Фејсбук заедно со објавените фотографии.
„Вијести“ утрово објави дека случајот против Кавачкиот криминален клан е еден од претресените во депото на Вишиот суд во Подгорица, откако мафијата нашла начин да влезе во просториите на таа институција.
Еден од изворите тврди дека тунелот бил копан најмногу месец и половина. Според тие информации, сопствениците кон крајот на јули го издале станот во подрумот на зградата, спроти страната на зградата на судот.
Акцијата најверојатно била спроведена во август, додека поголемиот дел од вработените во државната администрација, вклучително и во Вишиот суд, биле на годишен одмор.
Според еден од соговорниците на весникот, станарите на станот користеле лажни документи. Кираџиите вчера попладне биле сослушани во подгоричката полиција. Сопственичката на станот рече дека не ги познавала луѓето кои го изнајмиле станот.
