Северна Кореја објави дека најновото тестирање на интерконтинентална балистичка ракета има за цел дополнително да го подобри капацитетот за нуклеарен напад против непријателот.Таа земја веќе се закани дека ќе преземе дополнителни чекори како одговор на планираната заедничка воена вежба меѓу САД и Јужна Кореја.
Вчерашното лансирање на проектил како дел од тестот, прв оваа година, ги сигнализира намерите на севернокорејскиот претседател Ким Џонг Ун да ги искористи воените вежби на неговите ривали како можност за зајакнување на нуклеарната програма на земјата.
Државните медиуми на земјата објавија дека лансирањето на балистичката ракета било организирано „ненадејно“ без претходна најава и било дизајнирано да ја утврди нуклеарната подготвеност на земјата.
Во извештајот се наведува дека проектилот бил испукан под остар агол и дека за време на 67-минутниот лет поминал 990 километри по што ги погодил планираните води меѓу Корејскиот полуостров и Јапонија.
Деталите за летот на ракетата објавени од Северна Кореја, кои се совпаѓаат со претходните извештаи од нејзините соседи, покажуваат дека оружјето може да има дострел на територијата на САД.
Сепак, прашањето дали таа земја има функционална нуклеарна програма останува тема на дебата, додека некои научници се сомневаат во тврдењата на Северна Кореја дека успеала да развие технологија што би ги заштитила боевите глави од тешки атмосферски ефекти.
Минатата година Северна Кореја лансираше над 70 проектили, велејќи дека многу од тие тестови биле одговор на претходните заеднички воени вежби меѓу Јужна Кореја и САД.
