Лидерот на СНСД, Милорад Додик, денеска во Бања Лука изјави дека и оваа партија ќе биде против укинување на акцизата на горивото во Домот на народите на Парламентот на БиХ, бидејќи цената на горивата во БиХ е иста или пониска во споредба со регионот.
„И покрај фактот што Србија ги намали акцизите за 50 отсто, цената на горивото во Босна и Херцеговина и Република Српска е поевтина отколку во Србија, а да не зборуваме за Хрватска“, изјави Додик за новинарите по средбата со лидерот на „Народ и Правда“ партија, Елмедин Конаковиќ.
Смета дека со елиминацијата на овие приходи би се намалила шансата за развој, бидејќи меѓународните финансиски институции со кои се преговара за изградба на автопатишта, гледаат какви се и како се насочуваат акцизите.
„Ако акцизите се на ниско ниво, нема да можете да изградите ниту еден автопат. Нема богата земја без редовни даноци што треба да се плаќаат. Овде се создава еден сосема ирационален пристап, во кој треба да се ослободат сите даноци за да се живее како сите други и сите би биле среќни, што секако не е точно. Тоа значи дека нема патишта, училишта, градинки, болници и многу други работи“, рече Додик, кој е и претседател на Република Српска.
Тој нагласи дека одговорната политика налага да се задржат акцизите за да се зголеми нивото на изградба на автопатиштата во Босна и Херцеговина, додека сите кои се залагаат за укинување на акцизите тоа го прават од популистички причини.
Додик повтори дека акцизите овозможуваат пополнување на средства кои можат да бидат значајни за инвестирање во изградба на патишта.
„Понекогаш треба да излезете пред луѓето и да кажете – ова може да функционира, а ова не може. Имајќи предвид дека е вообичаено многу патни правци на кои им е потребна реконструкција да страдаат по зимата, би било погубно да се откажеме од приходите за реконструкција и изградба на патишта сега, а тоа ќе го кажат одговорните луѓе“, заклучи Додик.
