Седум лица загинаа во воздушен напад на неидентификувани авиони врз конвој камиони со оружје во источна Сирија, соопшти невладината организација Сириска опсерваторија.
Според организацијата за човекови права, седум возачи на камиони или лица кои ги придружувале, кои не биле Сиријци, загинале во нападот што го погодил конвојот во регионот Букамал, на границата со Ирак.
Според Опсерваторијата, камионите превезувале иранско оружје.
Нападот бил извршен врз шест камиони натоварени со иранско оружје веднаш штом ја преминале границата со Ирак и влегле на сириска територија, соопшти невладината организација.
„Камионите беа натоварени со иранско оружје“, изјави шефот на Опсерваторијата, Рами Абдел Рахман.
Иран ја поддржува сириската влада и проирански милиции се распоредени во пограничната област со Ирак. Иран не граничи со Сирија.
Според Опсерваторијата, најмалку два слични конвои влегле во Сирија од Ирак оваа недела.
Во ноември минатата година, најмалку 14 лица беа убиени во напад на конвој со оружје и камиони-цистерни што превезуваа гориво за проиранските милиции во Сирија, во близина на границата со Ирак, објави Опсерваторијата.
Во декември, началникот на Генералштабот на израелската армија, Ави Кохани, рече дека неговата земја стои зад воздушниот напад, велејќи дека конвојот носел оружје наменето за Либан, каде што проиранското вооружено движење Хезболах има силно влијание.
Израел ретко презема одговорност за нападите што ги извршува во соседна Сирија, кои се насочени против проиранските милиции, но вели дека сака да го спречи военото трупање на Иран на нејзината граница.
