Шефот на српската дипломатија навести дека може да ја сменат реториката во Белград и да воведат санкции против Русија. Ова е навистина условот на Брисел за напредок на преговорите во Европската унија. Уште еден знак дека српската реторика за нејзиниот традиционален сојузник се менува се зборовите на српската премиерка Ана Брнабиќ, која на отворањето на Еурактив Србија во Белград зборуваше за „руската агресија врз Украина“.
Српскиот министер за надворешни работи Ивица Дачиќ во средата за прв пат навести дека Белград може да го промени курсот и да воведе санкции кон Русија, што е едно од клучните барања на Брисел за унапредување на преговорите за членство во Европската унија. Тој нагласи дека Србија отсекогаш се раководела пред се од оценките за тоа што е во нејзин најдобар интерес, пишува бриселскиот портал Еурактив.
„Го осудуваме нарушувањето на територијалниот интегритет на Украина и така гласавме во меѓународните тела. Дали ќе воведеме санкции против Русија е друго прашање. Тоа не е прашање на време или рокови, тоа е прашање што се однесува на нашите политички и економски интереси“, рече Дачиќ во интервју за Еурактив.
Тој посочи дека од руската анексија на Крим во 2014 година, Србија не се приклучува кон санкциите на Западот, бидејќи смета дека тоа не е во нејзин интерес. „Доколку нешто се промени на штета на Србија, тогаш соодветно ќе ја прилагодиме нашата одлука, бидејќи во секој момент ќе оценуваме која е најдобрата одлука за нашата економија, за нашиот углед и за српските граѓани“, нагласи тој.
Шефот на српската дипломатија го нарече членството во ЕУ како приоритет на Србија, но тој беше критичен кон Унијата за одложување на проширувањето. „Често слушаме дека Балканот би можел да создаде нови проблеми доколку е во ЕУ, но ова е повеќе изговор бидејќи ЕУ забележа намалување на апетитот за проширување. Ова е прашање што не им носи гласови на европските политичари, па го туркаат на страна“, оцени тој.
Уште еден знак дека се менува српската реторика за нејзиниот традиционален сојузник, според порталот, се зборовите на српската премиерка Ана Брнабиќ, која на отворањето на Еурактив Србија во Белград зборуваше за „руската агресија врз Украина“. Премиерот, кој никогаш досега не користел ваква формулација, ја пофали и ЕУ како најголем инвеститор и донатор во Србија.
Србија формално аплицираше за членство во ЕУ во 2009 година. Таа е кандидат за членство од 2012 година, но пристапните преговори заглавија, а по почетокот на војната во Украина, односите дополнително се заладија. Србија ја осуди руската агресија врз Украина, но не сака да воведе санкции против Русија. Меѓу другото, во извештајот за проширувањето, Брисел го повика Белград да ја координира својата надворешна политика со ЕУ, што значи и приклучување кон западните санкции против Русија.
