ЕУЛЕКС го зголеми присуството на своите сили на северот на Косово
Мисијата ЕУЛЕКС соопшти дека го зголемила присуството на своите сили на северот на Косово, бидејќи смета дека ситуацијата во таа област е нестабилна.
„Внимателно ја следиме безбедносната ситуација во северниот дел на Косово преку нашето зголемено присуство на теренот. „Припадниците на нашата специјална полициска единица од Полска и единицата за европска жандармерија од таа земја вршат надзорни патроли, вклучително и пешачки патроли во Северна Митровица и Звечан“, се вели во соопштението.
Патиштата на северот на Косово, како и административните премини Јариње и Брњак се блокирани веќе 13 дена, откако локалните Срби поставија барикади поради апсењето на поранешниот припадник на косовската полиција Дејан Пантиќ.
За потсетување, ЕУЛЕКС во вторникот објави дека за време на патролите на северот на Косово бил вознемирен од „присуството на вооружени луѓе, често маскирани поединци и групи“. Тие оценија и дека безбедносната состојба на северот на Косово е вознемирувачка и тензична.
