Специјалниот претставник на ЕУ за надворешна политика и безбедност, Јосеп Борел, ги повика Белград и Приштина да ја деескалираат ситуацијата на северот на Косово, каде косовските Срби од саботата ги блокираат патиштата поради апсењето на поранешниот полицаец Дејан Пантиќ.
Пред почетокот на состанокот на Советот за надворешни работи на ЕУ, тој истакна дека двете страни мора да се вратат на дијалогот.
„Мора да ја надминат тенденцијата да се судираат на улица, да прават блокади. Тоа не е начин да се бара договор. Тоа не е начин да се водат разговори. Тоа не е начин да се бараат решенија. Ова не е начин да се оди кон нормализирање на процесот во кој тие се ангажирани“, рече Борел.
Тој додаде дека ЕУ мислела дека ситуацијата ќе се смири по договорот, „но, повторно, косовските Срби на апсењето на поранешниот српски полицаец одговорија со многу проблеми на улиците, блокирајќи ги патиштата, па дури и фрлајќи шок бомби. кај некои полицајци на ЕУЛЕКС“.
„Можете да разберете дека ова не е прифатливо… Оваа закана за јавниот ред, ова насилство е неприфатливо“, рече Борел.
Тој додаде дека е во контакт со премиерот на Косово, Аљбин Курти, со специјалниот претставник на ЕУ за дијалог меѓу Белград и Приштина, Мирослав Лајчак и српскиот претседател Александар Вучиќ.
„Знам дека двете страни сакаат деескалација и силно ги повикувам да го сторат тоа“, рече Борел пред почетокот на состанокот на министрите за надворешни работи на ЕУ, Украина, Молдавија, Грузија, Ерменија и Азербејџан.
