Штрајк на синдикатите има во Белгија, а најавен е штрајк и на универзитетските професори во Велика Британија.
Најголемиот аеродром во Белгија, бриселскиот „Завентен”, денеска ќе откаже половина од предвидените летови, а ниту еден авион нема да полета од базата на Рајанер поради штрајк на синдикатите, незадоволни од падот на куповната моќ.
Најголемиот аеродром во Брисел, што во септември имаше два милиони патници, соопшти дека очекува „сериозни нарушувања” и оти голем број летови ќе бидат откажани или одложени.
Вториот по големина аеродром Шарлроа, јужно од Брисел, ги откажа сите летови, објавено е на страниците на интернет.
Јавниот превоз речиси целосно ќе биде во прекин, штом белгиските работници почнат со маршот низ Брисел, барајќи поголеми плати и подобри услови за работа.
Годишната инфлација во Белгија во октомври достигна 12,27 проценти, најмногу од јуни 1975 година. Тоа првенствено се должи на порастот на цените на храната и на енергијата.
Во Велика Британија повеќе од 70.000 вработени во 150 универзитети ќе штрајкуваат три дена поради платите, работните услови и пензиите, соопшти Синдикатот на универзитети и колеџи.
– Кампусите низ Обединетото Кралство ќе почуствуваат штрајк од досега невидени размери – истакна генералната секретарка на Синдикатот, Џо Грејди во изјава објавена на неговата интернет страница.
Како што тврди Грејди, „овој спор има огромна поддршка од студентите, бидејќи тие знаат дека нивните услови за учење се работните услови за нашите членови”.
Штрајкот е најавен да се одржи на 24, 25 и 30 ноември.
