Во нов извештај, Институтот за проучување на војната (ISW) го анализираше големиот говор на рускиот претседател Владимир Путин на конференцијата на клубот за дискусија Валдај во Москва во четвртокот.
Во својот говор Путин повторно ја отфрли идејата за суверенитет на Украина на начин што е фундаментално некомпатибилен со сериозните преговори меѓу двете соседни земји. Рускиот лидер рече дека „единствената вистинска гаранција за украинскиот суверенитет“ може да биде само Русија, која ја „создаде“ Украина.
Путин повтори дека е „историски факт“ дека Украинците и Русите во суштина се еден народ поделен во различни држави.
Тезите на рускиот претседател го отфрлаат правниот факт дека Украина е целосно суверена држава, дека Руската Федерација го признала суверенитетот на Украина и дека украинскиот народ постои како посебна нација.
Наративот на Путин дека Украинците и Русите се еден народ поделен во различни држави укажува на неговата постојана цел да ја уништи украинската држава и да го избрише поимот за украинскиот народ, истакнува ISW.
Овие изјави, заедно со многу руски акции, мора да предизвикаат сериозно размислување за прашањето дали војната на Русија против Украина е геноциден чин бидејќи геноцидот е законски дефиниран како „акти извршени со намера да се уништи, целосно или делумно, национално етнички, расни или религиозни групи“.
