Малолетничките на кои им е изречена мерката „упатување во Воспитно-поправен дом (ВПД)“ ќе ја издржуваат во „Волковија“ во Тетово каде што условите се многу подобри од оние во кои три девојчињата до скоро ја издржуваа оваа мерка во адаптирани услови во затворот во Идризово, најави денеска министерот за правда Никола Тупанчевски на настанот „Преглед на реформите поврзани со правдата на децата“ на прашање на МИА да го коментира Извештајот на Европската комисија во кој се нотирани несоодветни услови за малолетничките во Идризово.
– Во таа насока ние како Министерство за правда веќе реагиравме, постапивме по тие препораки, забелешки и тој проблем инстантно е решен. Меѓутоа, работиме на системско решавање на проблемот затоа што има посебна установа во близината на Тетово која што претставува институција за згрижување на деца коишто пројавуваат девијантно однесување. Во таа насока Министерството за правда работи на изнаоѓање системско и трајно решение во однос на статусот на децата и како извршители на кривични дела – истакна Тупанчевски.
Судијата Лазар Нанев, пак, минатиот месец на прашање на МИА за условите на девојчињата во ВПД информира дека женските деца кои се наоѓале во одвоениот дел во Идризово, се отпуштени. На прашањето што доколку има потреба од упатување други девојчиња во ВПД, Нанев рече дека сè уште нема институција исклучиво за девојчињата, бидејќи ВПД во Волковија е само за момчиња, така што, тие би биле сместени повторно во Идризово.
– Не можат да бидат сместени и девојчињата и момчињата во иста градежна целина. Ние сè уште немаме посебна институција исклучиво за женски лица, и нормално, најголемиот дел од критиките доаѓаат токму од меѓународната заедница во која насока треба да се движи државата. Една од нашите активности е токму во делот дека државата мора во наредниот период да создаде институција која според своите архитектонски градежни решенија ќе биде издвоена од КПД Идризово каде што казната ја издржуваат полнолетни машки и женски лица – додаде Нанев.
Во сторијата на МИА за условите во импровизираниот ВПД за девојчиња во Идризово беше објавено дека кога имаат потреба од нешто, малолетничките, сместени во адаптирана соба во ходник во рамките на Казнено-поправната установа Идризово, се принудени да викаат преку прозорецот од тоалетот, бидејќи немаат уред за повик до службите.
Овие штитенички, спротивно на законот, беа сместени во просторија која не обезбедува целосна изолација, односно оневозможување контакт со осуденичките со кои се во допир при добивање на храната и при користење слободно време за прошетка на отворено. Малолетничките беа сместени во една трошна и студена просторија за која рекоа дека понекогаш нема и вода. Единствена активност таму им е цртањето и прошетката во дворот, што го делат со останатите возрасни затворенички и за што мора да чекаат слободен термин.
За разлика од нив, штитениците во Воспитно-поправниот дом – Тетово, каде беа сместени 21 момче, имаат уредни, опремени соби, тоалети, училници, вежбалница, игралишта на отворено, менза, работилници и многу други алтернативи со кои на креативни начини го исполнуваат нивното слободно време. Со штитениците во Волковија работи тим од воспитувачи, како и психолог, педагог и социолог, додека, во Идризово, малолетничките имаа само една воспитувачка која ја делат со сите останати затворенички.
