Хрватска и Франција ја финализираат набавката на противвоздушен систем со краток и среден дострел, кој би можел да чини околу половина милијарда евра, пишува во вторникот Јутарњи лист.
Министерот за одбрана Марио Баножиќ минатата недела откри дека седум месеци се водат преговори со Франција за модернизација на хрватската воздушна одбрана и дека веќе се обезбедени материјални ресурси на ниво на еден баталјон, а целта е да се обезбедат средства за пет баталјони во многу кратко време.
Според неофицијални информации, Хрватска најпрво би го набавила системот со краток дострел Мистрал 3. Станува збор за пренослив ракетен систем со инфрацрвено наведување дизајниран да соборува авиони и проектили на височина до три километри.
Ракетите може да се истрелаат од рамо, од специјални лавици со по две ракети, но и од бродови, хеликоптери и возила. Тоа значи дека Хрватската армија може да ги користи на бродови, возила Patria и хеликоптери Blackhawk.
Според неофицијални информации, договорот за купување на овој систем би можел да биде потпишан до крајот на оваа година, а испораката би се одвивала во неколку фази во текот на 2023 и 2024 година.
Хрватските и француските преговарачи разговараа и за идното купување на противвоздушен систем со среден дострел, а практично беше договорено и купувањето на системот VL MICA. Станува збор за копнеен противвоздушен систем со среден дострел кој користи ракета „оган и заборави“. Дострелот на ракетата е меѓу 20 и 30 километри, тежината на ракетата е 113 килограми, со боева глава од 12 килограми, а има и радар Талес АД4А. Неговата брзина е 3 мах (над 3000 километри на час).
Во Генералштабот на хрватската армија се уште се прават анализи колку PZO системи со среден дострел треба да купи Хрватска. Се очекува договорот за набавка да биде потпишан следната година и да бидат испорачани до 2026 година.
Доколку овие најави се остварат, хрватската армија засега нема да има потреба од далечен ПЗО систем, пишува новинарот на Јутарњи лист, Крешимир Жабец.
