Раперот Канје Вест привремено остана без својот Твитер профил. Компанијата го заклучи во саботата поради твитање со антисемитска содржина. “Заканата за Евреите еднаш заврши со геноцид. Вашите зборови болат и поттикнуваат омраза. Ве молиме престанете”, остро одговори актерката Џејми Ли Кертис на зборовите на Вест.
Раперот Канје Вест ја вознемири јавноста со уште една од неговите многубројни контроверзни објави на социјалната мрежа Твитер, овој пат со антисемитскиот твит што го објави во саботата.
Во твит тој ги нарече Евреите закана и напиша дека „си игравте со мене и го бојкотиравте секој што се спротивставува на вашите скриени интереси“. Тој, исто така, напиша дека тој самиот не може да биде антисемитист, бидејќи црнците всушност се Евреи.
Твитер го заклучи профилот на Вест, а твитот беше заменет со порака дека тоа е кршење на правилата на Твитер, најверојатно оние кои забрануваат говор на омраза.
Многу ѕвезди реагираа на навредливиот твит, американската актерка Џејми Ли Кертис многу остро. Како одговор таа напиша: „Минатата недела го прославивме најсветиот еврејски празник. Зборовите се важни. Заканата за Евреите еднаш заврши со геноцид. Вашите зборови болат и поттикнуваат омраза. Ти си таткото. Ве молиме запрете.”
Таа потоа повторно проговори за Вест во емисијата Today Show на NBC, признавајќи дека се расплакала кога првпат го видела твитот. „Доста е лошо што фашизмот се зголемува низ целиот свет. Но, да го објавите на Твитер? Како Евреите да не страдале доволно?“ се прашуваше таа во понеделникот.
Колку долго Вест ќе биде без контрола врз неговиот профил не е јасно. Во моментов тој не може ниту да објавува на социјалната мрежа Инстаграм бидејќи и овој профил е блокиран од компанијата Мета поради слично прекршување.
