Европската комисија ја потврди препораката за укинување на визниот режим за граѓаните на Косово и наведе дека препораката која датира од 2018 година останува „целосно валидна“, пренесе Радио Слободна Европа (РСЕ).
Тоа е клучен документ кој ќе биде основа за донесување одлука за визна либерализација за Косово на ниво на земјите членки на Европската унија.
Според документот до кој РСЕ имала пристап, Косово има воспоставено силна правна и оперативна рамка за борба против корупцијата, организираниот криминал и справување со миграциските и безбедносните ризици.
„Косово продолжи да го консолидира напредокот во клучните области идентификувани во патоказот за либерализација. „Следствено, основата за препораката на Комисијата за 2018 година за ослободување на косовските граѓани од барањата за виза за краток престој останува целосно валидна“, се наведува во документот.
Законодавните процедури кои би довеле до одлука за укинување на визниот режим формално започнуваат на 13 октомври, кога ќе се состане работната група за визите за да започне првата дискусија за ова прашање.
Во 2012 година Косово доби Патоказ за визна либерализација. Потоа, во 2018 година, Европската комисија потврди дека земјата ги исполнува сите критериуми за укинување на визниот режим.
Европскиот парламент, една од двете институции кои одлучуваат по ова прашање, во неколку наврати гласаше за визна либерализација за Косово.
Со години прашањето е закочено на политичко ниво, односно во Советот на министри на ЕУ, кој ја носи конечната одлука, поради недоволната политичка волја за продолжување на процесот, пренесува РСЕ.
Според процедурите во европските институции, откако Европската комисија препорача визна либерализација за една земја, процесот на одлучување се води на ниво на Европскиот парламент и на Советот на министри на ЕУ.
Србија, Црна Гора и Северна Македонија имаат визна либерализација од декември 2009 година, а Босна и Херцеговина и Албанија ја добија една година подоцна, во декември 2010 година.
